Busturialdeko Hitza

'Urdaibaiko organoak Joxe Mari Eguileor' zikloa aurkeztu dute

Kultura Busturialdeko zazpi herritan egingo diren hamar organo kontzertuen berri eman dute antolatzaileek.

E. atxikallende

Atzo goizean aurkeztu zuten Euskal Herria Museoan `Urdaibaiko organoak Joxe Mari Eguileor´ kontzertu zikloa. Aurtengoa bosgarren ekitaldia da eta Urremendiren, Aldundiaren eta kontzertuak egingo diren udalen laguntza izango du. Zikloa bihar hasiko da Bermeoko San Frantzizko elizan, eta abuztura arte luzatuko da.

Gorde beharreko ondarea

Guztira hamar kontzertu emango dituzte, eta 29.000 euroko aurrekontua izango du. Aurrekontuan organoen afinazioa eta konponketak ere sartu dituzte.

Egindako aurkezpenean Benantzi Bilbao Mundakako musikari eta organo-jole ospetsuak parte hartu zuen, kontzertu zikloaren sustatzaile delako. Haren esanetan, «gure organoak ez baditugu erabiltzen eta gutxienez urtean behin jotzen, izorratu eta galdu egingo dira». Horrez gain, zikloak «gure ondarea gordetzeko» balio duela esan zuen.

Aurtengo ekitaldiko zerbait azpimarratzekotan berreskuratu dituzten bi organoak izango litzateke. Aurton ehun urte egin dituen Gernikako Mertzedarien organoa, alde batetik, eta Bermeoko Santa Maria elizakoa, bestetik.